Jephuru chwng kunu mungsa jwngjalo kwlai khe, eba kunu hamya situation no eba bipodo kwlai khe, chwng chini sakni giyan bai, buddi bai, sima bai tei bigan ni lamatwi a jwngjalni yoknani lama naitugwi kario. Kwbangma jorao chwng chini sak sakni simung tei buddi bai lama swnamwibo mankha.
Phiya, tumung chwng chini langmao omohai jwngjalo kwlai kha ta, je aro yoknani kunu lamase nuhurliya, chini buddi, chini simung, tei bigan chwng no lama phunugwi se manliya. Bohrok joto salai kha, aro tei yoknani lama kwrwi kha hwnwi, abohai jora-o chwng bahai khe yoknai? Sabo chwng no phiyogwi man? Sabo chwng no lama phunugwi man?
Sabo chwng no lama swnamwi rwnai a jwngjal eba bipod kotorni jorao?
Kiching o mangpili no nai naidi, o borokni yoknani kunu lama kwrwi kha. Buphang ni nongkhorwi phai khebo singho bai chajaknai, buphango chonglai tong khebo chibuk bai sukjaknai, twio bakhlai khebo kumbir bai chajaknai. Biyang thangsinai, kunu lama kwrwi kha. Borok ni buddi, giyan, tei bigan bebakno sanai aro tei bachinani lama kwrwi kha hwnwi.
Kaitorno Poito Khlaima Bahai khe Lama Swnamwi Man?
Phiya kiching nwng poito khlai da man, je aro tabukbo mungsa lama tongkho? A lama tamo wngwi man?
Tumung o jora nini langmaobo abo hai jora hamya bai eba bipod bai malai ma tongo hwn khe, nwng yoknani bagwi tamo khlai kha? Nini giyan, buddi, sima nukma nono mungsa lama phunugwi manliya, hakhe o jora solution tamo? Chwng tamo khlai thai? Sabo chwng no lama phunugwi man?
Kiching nwng saida man, obo hai situation ni jorao’-no borokni bisingo poito achaio, Borok Kaitor no poito khlaina chengo. Kaitorno poito khlaina no karwi bini tei mungsa lama kwrwi. Kaitor no poito khlaima eba borosa khlaima ni abono paithak ni lama. Je jagao chini mokol mungsa lama nukliya aro poito chwng no lama phunuknai. Je jagao chini sima, buddi, giyan joto kunu solution rwi manliya aro Kaitor ni thani poito yapharwi a situation no yachagwi namani abo no paithakni lama.
Aboni bagwi no elembago tamo sakha naidi.
Proverbs chapter 3:5,6 “Bwkha rw sugwi Subraiyungno poito khlai di tei nini sak-sak sima-o bwkha ta bera di. Bebagono nwng bono bwskango tondi, hakhe bo nini lamarokno kepleng khlainai.”
Sadrach, Mashek and Abednego songni Phunukmari
Chwng nugo, Daniel bijab ni chapter 3, Daniel ni bikiching khorokthamrok; Sadrach, Mashek tei Abednego. Bohrok Raja Nebukhadnejar ni mangthong no khulumya wngma bai bohrok no hor blwngo khiklai jakha. Jephuru bohrokno hor blwngo khiklaijakna thangwi tongo aphuru bohrok Raja no sakha, “O Raja, chini Kaitor chwng no nini yakni phiyogwi mano. Tumung Kaitor chwng no phiyok phaiya wngkha, chwng horo khiklaijagwi bwtharjak nani tiyar tobo chwng chini kwthang Kaitor no simi se khulumnai. Omose bohrokni faith tei commitment.
Bohrokni o situation nobo chwng nugo aro bachinani tei kunu lama kwrwi. Bohrokni bwskango sudu hor simi se. Phiya bohrok Kaitor no poito yaphar kha tei a hamya situation no yachagwi nakha. Jephuru bohrokno hor blungo khiklai jakha, Kaitor bohrok bai hor blungo malai kha tei bohrokno hor bai khamwi thwina rwliya. Hor suda Kaitor ni kok khwnaui bohrok no mungsa khlai manliya.
Tabuk sadi omono chini giyan, buddi, simung tei bigan obo hai patina swkang chwngno lama de phunugwi man? O lama eba solution Kaitor ni bisingo se huijak, obono chini simung ni mokol bai nugwi manya. Aboni bagwino elembago sao, “,,nini sak-sak ni simao bwkha ta beradi,..”
Daniel ni Phunukmari
Haino hai chwng nugo tei kaisa gotona, Daniel chapter 6. Aro chwng nuk kha, kisa borok hamyarokni karonwi, Daniel no singho kholao, khiklai rwjak kha. Raja Darius no maniya, khulumya borokno singho kholao khiklaijaknai hwnwi raja Darius ni hao sakhlai rwjak kha. Hakhe Daniel bini surima nogo thangwi Jerusalem ni nokthar bwkhak naharwi Daniel salo uaitham suri kha. Daniel Raja Darius no khulumya wngma bai bono singho kholao khiklai rwjak kha.
Hakhe oro Daniel ni bagwi yoknani lama tamo? Singho kholao kwlaiui bahai yoknai hwnwi chwng uansugwi mannai ba! Chini simung tei buchimung chwng no swrai swrai saui rwo je chwng singho bai uarwi chai paijaknai hwnwi. Chini simung chwng no bachinani lama phunugwi se manya o situation o.
Hakhe Daniel ni bagwi aro tamo solution tong? Solution wngkha, bo Kaitor no poito khlai kha, tei a situation jeswk phano hamya wngthung, bo abono yachagwi nakha. Bo thwinani tiyar tobo raja Darius no khulumna bagwi bo bini Kaitor no yakarwi manya.
Bini Kaitor no poito khlaima tei bipod no sago yachagwi namani aro se solution achaio. Kaitor suarirok no rohorwi singhorokni bukhukno muthubwi tonkha, hakhe bohrok Daniel no mungsa khlai manli ya. Daniel hopung singhorok bai baksa, taini salo Raja Darius uanajagwi Daniel no thangwi naikha. Hakhe bo Daniel no kwthang nugwi belai uanajak kha tei Daniel ni Kaitor no kirijak kha. Tei ulo Raja Darius hani joto borokno sakhlai rwkha, je tabukni simi Daniel ni Kaitor no se ma khulumnai hwnwi. Oro chwng nukha, sudu Daniel ni jwngjal simi solve wngya, tamo khe Kaitor ni mungbo chwngsacha khlaijak kha.
Obo hai Bible o kwbangma no phunukmari tongo.
Musi ni Phunukmari
Musi jephuru Israel rokno Egypt hani phiyogwi haching panthor bolong twi thangwi twijlang bwskango bachaui-o, aphuru bohrokni bagwi bwskang agogwi thang nani mungsa lama kwrwi kha. Yang khe uklogo Pharo Raja sena twiui, Israelrok no riphrigwi thangjak. Tumung Israelrok dakti twijlang par wngwi thangya khe Pharo tei bini senabahini bohrok no tanwi bwthar bai nai tei bohrokno khaui haino hai Egypt hao twlangwi thang nai. Aboni bagwi bororok chirik khogwi Musi ni thani kablaijak.
Musi pal manya tamo khlai nai. Kiphilwi thangwi manya, lamao Pharo ni sena phai tongo, bwskang agog nabo, twijlang se kotorma. Borokni mokolo aro tei kunu lama kwrwi kha. Sabose sai man, Kaitor twijlang twi lama swnamna thangwi tongo hwnwi!
Also read: Jisaia 40:31 Bwtang ni Meaning Tamo? Kaitorno Khatungma
Hakhe Kaitor musi no sakha, twijlango latha bai buna bagwi, Musi Kaitor ni dagima haino khlai kha. Kaitor uanama singcha khe twijlang no khaknwi khlaiui hakung kwran lama swnamwi rwkha.
Obo nini simung, ani simung tei bigan ni phan bai khlai manya. Obo sudu Kaitor ni phan bai simi se wngwi mano. Phiya Kaitor ni a phan no nini langmao, ani langmao nukjak rwna hwn khe, chwng chini sak sakni simao bwkha beramano yakarwi Kaitor ni thani poito ma yapharnai tei jeswk phano jwngjal eba bipod kotor phaithung chwng abono chini langmao ma yachaknai.
Obo hai jwngjal kotoro chwngno thainwi manwi simi se lama rwi mano. Abohrok wngkha:
- Kaitor ni sakao poito khlai nani eba borosa khlai nani.
- Tumung Bo chwng no bachirw phaiya phano wngkha, hai phano chwng Bono yakar ya, tamo khe a jwngjal no eba bipod no manjakna bagwi tiyar wngmani.
Hakhe tabuk kiphilwi phaidi chini o mangpilio. Tabuk sadi o situation ni bagwi solution tamo?
Chini buchima tei nukma sao, oro tei solution kwrwi. Ao abo soino oro tei kunu solution kwrwi, sudu thwina simi se solution.
Phiya Elembag ni kwbangma phunukmari ni bisingtwi chwng sai man kha, orobo solution tongo. Abo wngkha,
- Kaitor ni thani poito yaphar mani. Bo bachirwi mano, eba Bo lama swnamwi mano hwnwi poito khlai mani.
- Tei Kaitor chuba phaiya phano ang Kaitor no hamjago, ang Kaitor no simi no poito khlaio tei ang Bono simino monnai hwnwi kumbir kholao bakhlaina bagwi tiyar wngwi man khe. Je chwng chini mokol bai, sima bai lama nugwi manya arono Kaitor lama swnamwi rwnai.
Wngwi mano Kaitor kumbir ni bukhukno muthubwi tonnai, hakhe kumbir chwng no mungsa khlai se manglak.
Hakhe paithago obono srwngmung chwng mano, jeswk jwngjal kotor chini langmao phaithung chwng kunu din Kaitor no khibiui kharya. Kaitor ni seba khlaima yakarya. Kubun takjak mwtai ni seleng khatiya. Thwibo chwng Kaitorni, thangwi bo chwng Kaitor ni.
Also read: Kokborok Christmas Message 2023 | Rev. Anand
Chini langmao je wngo abono wngna rwdi. Tamo khe nini sakni simao, buddio, bwkha ta beradi.
Kaitor ni sakao se poito yaphardi. Sai mandi Kaitor wngkha phan gnang. Kunu jwngjal Kaitor ni slai torwi manya. Kunu bemar Kaitor ni swlai kwplai wngwi manya. Kunu bipod Kaitor ni swlai ragwi manya.
Kaitor khlai manya mungsa kwrwi. Je jagao chini mokolo aro mungsa lama kwrwi, aphuru no Kaitor lama swnamo.
Kaitor nini bagwi lama swnamnai. Bono poito khlai di tei jwngjal no sago yachagwi nadi.
O kokthai ni bisingtwi Kaitor nono bahai khe hamari khlai kha comment khlai sadi. Tumung o message nono hamari khlai tong khe please buino bo share khlai di hakhe bohrokbo o hamari no yachagwi mannai.
Hambai channel bai krwngwi tongma bagwi. Kaitor nono hamari khlaithung. You can also watch the video on this message. Go to Khorang Anand Channel.