Jisaia 40:31 bwtang ni meaning tamo? O bwtang ni bisingtwi chwng tamo srwngwi man tini? Kaitor no khatungma bahai khe chwng no phan kwtal rw ui man abono chwng tini oro silai anw.
"Phiya ba Subraiyungno khatungwi naisingwi tongnairok, bohrok phan kwtal mannai, bohrok Toling hai khe bwkrang phehelwi kuchugo bir anw, bohrok khabrum phano leng glak, bohrok him phano bel glak" (Jisaia 40:31).
“But those who hope in the Lord will renew their strength. They will soar on wings like eagles; they will run and not grow weary, they will walk and not be faint” (Isaiah 40:31).
Chini Christian langma jora-o uansugwi naikhe ulta haise. Aboni phunukmari wngkha, nwng mwthangjakna bagwi samung khlai manya (can’t work to earn salvation); nwng abono khairokma bai se mano. Jephuru nwng langmano romwi narwkna naio nwng abono kwmai thangjago, phiya jephuru nwng langmano kwmajago aphuru khe nwng a langmano manphiro. Obo belai ulta hai ya de?
Obo haino chini langma-o swngchar je samani bebakno chini thani ultano wng na nango. (For us everything is contrary to what the world tells us to do).
Jisaia 40:31 Bwtang ni Meaning Tamo?
Jephuru chwng Jisaia 40:31 bwtang no porio, chwng tai kaisa ulta manwi nugo. Oro chwng nugo, Subraiyung no naisingmao, poito yapharmao tei khatungmao se phan mano hwnwi samani. Hakhe o kokbo normally chwng bahai khe phan man a kok bai belai ulta (oxymoron). Hakhe Jisaia 40:31 bwtang tamo kok sana nai oro. Chwng bahai khe o kokthaini buchimung no soi lamatwi sago thepaui man?
O Jisaia Bijab ni Bwtang Tamo Meaning Buchi Rwna Nai?
Hakhe phaidi tabuk chwng o verse ni kokno swbai nailai anw. Oro je key kokthai wngkha “Khatungma”. Oro je Subrayungno naisingma, trust eba bhorosa khlaima abohrok “Hope” eba khatungma kokthai ni kokbokhiri se. Khatungma no rwktharwi se tei oro kok sajago.
Aboni bagwi, Subraiyung no khatungma bahai khe chwngno phan rw a kokno se chwng oro ma buchilai nai. Kaitorni sakao poitu yapharwi naisingwi tongmani abo’no nono khatungma eba asha rwo. Abo bai nwng asha ui tongo je Kaitor ni aroni mungsaswk kiphilwi phaianw hwnwi. Kaitorni thani nwng je sanmani abono mannai hwnwi nwng naisingwi tongo tei abono nini khatungma eba hope.
Je borok Kaitor ni sakao hope tono bo Kaitor rwnai hwnwi poitu khlaima kwlai-o. Hakhe aboni karonwi bo khatungwi tongwi mankha tei naisingwi tongnani phan bo mankha.
Kaitor ni Sakao Hope narwkmani abo nini langmao bwthai kaham tubuo, aboni 3 reasons wngkha:
Chwng uansugwi mano, naisingmani tei hope khlai tongmani abo belai selerma singcha hwnwi. Phiya chwng oro nuk kha obo se chwng no phan rwo tei chini langma-o bwthai tubui rwphaio. Nwng Kaitor ni sakao hope khlaima bai nwng kwtal khe phan rwjak kha. Tabuk swngmung khe; abo bahai khe kubui wngma klai?
Phaidi ang nono kaitham reasons swbai sawanw:
#1. Naisikma (Focus)
Kaitor ni sakao hope eba asha khlai tongmani abo nini sak sakni jora hamyano nukya khlaio phiya nini mokol no Kaitorni phaising tono. (Focusing on the LORD).
Jephuru nwng Kaitor ni sakao hope tono, hakhe abo je mokol bai nwng nini sakni jwngjalno nugo ajagani nini mokolno norwi Kaitor ni bwkhak twlango. Je nwng swngcharni hamyarokno mang nugwi tongmani aroni norwi nini mokolno Kaitorni phan tei paiphlaiya hamjakma nini bagwi tongmani aro se twlangwi thango. Hakhe aphru nwng nini jwngjalno pogwi thango. Aphuru nini mokolo Kaitorni phan tei hamjakma simi no nukjago.
Aboni bagwi no Kaitor ni sakao hope narwkmani abo chwngno phan rwo hwnwi sajago. Kaitorni thani hope khlai mani abo chwng chini sakno yapharmani samung se. Jephuru chwng chini sakno Bini thani yapharo, aphuru chwng gosiui nao Kaitor se chini jora hamyani sai kotorkuk hwnwi. Chini hamya chaya tei uanapojarok Kaitorni thani mungsa chukya.
#2. Poitu (Faith)
Kaitorno khatungma eba hope khlaima abo nono phan kwtal rwo.
Jephuru chwng Jisaia 40:31 bwtang no poriui naio, abo chwng no buchirwo je chini poitu kwrwi wngwi tongmani eba asha kwrwi wngwi tongmani jorao chwngno phan kwtal khlai rwi mano. Jephuru Kaitorno khatungma chini poitu no rakrwo, abo chwng no chini langmani satok tektono soinani phan rwo. Tei a poitu chini bisingo khakchangma rwo tei chwng no bwkha kwrak khlai rwo. Langmani bebak hamya jorao ragwi tongnani phan rwo. Phiya obo wngwi mano sudu nwng Kaitorno khatungwi tei naisingwi tongma bisingtwi.
#3. Kwrak khe Bachaui Tongma (Fortitude)
Kaitorno khatungma nono continue kwrak khe bachaui tong nani phan rwo.
Tabuk kaitham reason wngkha, Kaitorno khatungma abo nini uansukmao nono bwskang agogna bagwi phan rwnai. Hamya jorao phano nwng bwkha kwrak khe bwskang agogwi thangwi mannai, tamni hwnkhe nwng poitu khlai man kha je Kaitor nini jora hamyao phai ui nono chuba phai nai. Hakhe abo’no nono jora hamyao phano kwrak khe bachaui tong nani phan rwo. Oboni bisingtwi, nwng sak bel phano kwbangma jwngjal bai choba khlai nani phan mano.
Jisaia 40:31 Bwtang Nono Bahai khe Bwkha Bacharw Tini?
Tomung o swngchar nono kwbangma jwngjal tubui tekto rwi tongo tei nini phan no pairwna naio hwnwi nwng tabuk uansugwi tongo. Tei jwngjal ni listbo nini yago kwbangma. O jorao nwng tamo khlai nai? Good news khe, nini jeswk phano jwngjal bangwi tong di, abohrokni sai Kaitor ni phan se torkugo.
Nwng 31 bwtang ni swkang Jisaia 40:28-30 bwtangrokno-bo poriui naidi, aro nwng nuknai chini thani phan phaimani yaphang tei Kaitorno khatungna nangmani karon.
" Nwng saui manya da? Nwng khna ya kho da? Subraiyungno mol brumni Kaitor, hani paithak jora snamnai sa. Bo lengjak ya tei sak belwi thang ya, bini simung no naitugwi pai rwui man ya. Bo lengjakrokno phan rw-o, tei phan kwrwi borokrokno phan boksinwi rw-o. Phiya siklarok bo lengjago tei belo, tei siklabo lengwi kwlai-o" (Jisaia 40:28-30). Kokborok Version.
“Do you not know? Have you not heard? The Lord is the everlasting God, the Creator of the ends of the earth. He will not grow tired or weary, and his understanding no one can fathom. He gives strength to the weary and increases the power of the weak. Even youths grow tired and weary, and young men stumble and fall” (Isaiah 40:28-30). English Bible.
Reason 1: Chwng Kaitorno khatungna nangmani puila reason wngkha; O bwtang chwngno buchirwo, jephuru chwng lengjak tei beljak aphuru chwng Kaitorni sakao hope eba khatungma narwkna nango. Sai mandi chini Kaitor kunudin lengjakya tei belwi thang ya. Chwng lengwi mano tei belwi mano phiya Kaitor kunu phuru phano lengya. Aboni bagwi no chwng Bono khatungna kwlaio.
Reason 2: Chwng Kaitorno khatung nani tei kaisa reason wngkha, Kaitor sakbaithang chwngno kok rwkha je Bo lengjakrokno lenglama rwnai tei phan kwrwirokno phan rwnai. Bo sao, ‘…jephuru norok belo tei lengjago, ani phan norokno rakrwnai, tamni hwnkhe ang ani paiphlaiya phan no norokno rwna bagwi tiyar.’
Reason 3: Subraiyung no khatung nani paithakni reason wngkha, Kaitor swkang no sai mano chwng buphuru lengwi kwlaino tei belwi thang no. Sai mandi, chwng lengmani tei belmani abono twi Kaitor chwngno selengya. Bo chwngno yoknani lama se swnamwi rwo. A yoknani lama wngkha Bini sakao ‘Khatungma’ tonna ni eba asha khlai nani.
Jeswk phano hamya jora phaithung chini langmao, chwng abono naisikyaui Kaitorni sakao tei Bini kok rwmani sakao poitu yapharwi Bono naisaui tong nai. Jephuru obo khlai mano hakhe Bini paiphlaiya phan chini sakao phainai. Abo bai chwng kwrak khe bachaui tongwi mannai.
Also read: Kaitorno Poito Khlaima Bahai Khe Solution Wngwi Man?
Nwng Bahai Tong Tini? (How Are You Doing Today?)
Nwng belai lengjak de?
Nwng sakno belai kebel tei uana poja twi lengjak hai de ma tong?
Langmani jwngjal ni bagwi eba jora hamyani bagwi nwng sak thwi tongma hai de ma tong?
Chini langmani jwngjalrok chwngno belai lengrwo tei bel rwo. Swngcharni jwngjal chini phan no chaui khibio. Phiya chwng buchina nango je aswk jwngjalrokni bisingo phano chwng kwrak wngwi tongwi mano. Abo chini sakni phan bai ya tamo khe Kaitor ni sakao hope narwgwi man mani phan. Kaitor wngkha chini phan ni yaphang. Bini aroni se chini thani phan phaio tei a phan bai simi se chwng jwngjal kotorma ni bisingo phano kwrak khe bachaui tongwi mano. O bebak amjokmungno soinani phan Kaitor se rwnai.
Aswk jora hamyao Kaitorni aroni phan yachaknani lama wngkha; bono naisingwi tong nani tei khatungwi tong nani (waiting and hoping). Obo se chwngno kebengwi bachanai jwngjalrok no kasuo.
Hakhe Kaitorno khatungma no ta mwthak di. Nwng jesa jagao phano tong di, jesa jwngjal phano manjagwi tong di, Kaitorni swmai ni sakao poitu yaphar di, Bini sakao hope tondi, hakhe Bo nono phan kwtal rwnai. Subraiyung no khatung nani eba hope khlai nani abo simino kaisa lama jephuru chwng bwkha thwiui tongo. Kaitorno hope khlai mani abo simino chwng no phan rakrwi man nai obotwi jora hamya-o.
Follow us Social Media Channels: Facebook/KhorangAnand, YouTube/KhorangAnand