Kokborok Christmas Message 2024 by Rev. Anand Debbarma. Topic: Langmani Gift or Gift of Life.
Jotto-no khulumm kha!
Puila no 2024 bisi ni ani khapang ni hamjakma tei khulummung yapharo. Christmas tei Bisi Kwtal ni chibai tei ang jotono-no wish khlaina muchungo; Merry Christmas and Happy New Year!
Tini ang norokni thani, 2024 bisi ni Christmas ni message tubui phaio. Ang sai mano jotono Christmas ni bagwi tongthoklaijak tei khatung khaja ni bisingtwi jotono janija mothao celebration ni bagwi tiyar wnglaijak. Bisi brum, Hayung ni joto borokno, khatung khaja khe Christmas sal no palai lai tongo.
Phaidi tini chwng, o message ni bisingtwi Christmas tamo tei Christmas chini langmao tamo hamari tubu aboni kokno silaianw.
Christmas Message – Gift of Life or Langmani Sokat
Christmas tamo?
Chwng jotono sai mano, Christmas wngkha, chini Mwthangnaisa, Bugra Jisu o hayungo borok ni mang naui Kwthar Mery ni oktwi achaimani sal. Omo, Kaitor sak baithang borokrok no sumsok ni phiyokna bagwi swngcharo phai mani sal.
Elembago sajak tongo; Johon 3:16-17 sao,
“Tamni hwnba Kaitor swngcharno aswk hamjakmani bagwi bini songdari Sajlano rohor kha, bini a Sajlano poito khlainai borok bo komor yaui mwthangjak phlaiwi manna twi khe Kaitor bono rohor kha. Kaitor bini Sajlano swngcharno majra berna hwnwi swngcharo rohor ya, tamo khe swngchar ba bo bai mwthangjak si thung hwnwi se rohoro.”
Aboni bagwi no chwng sai mano, Christmas wngkha; Kaitor ni hamjakma kotor nukjakmani sal, borokrok no mwthangna bagwi Kaitor o hayungo phaimani sal, swngchar mwnago pohor chwngsa mani sal. Khatungma kwrwirok khatungma man mani sal, kubui lamani pohor chwngsama sal.
To watch more videos and messages go to Videos.
Christmas ni Sal Chini Langmao tamo Hamari Tubu?
Christmas ni salo borokrok janija hamjakmatwi mare kichingsong no, takhuk bukhuk rok no eba dol sak baksa no gift rwlaio. Abo kaisa hamjakmung ni mari . Chwng jotono gift manna hamjago. Phiya o giftrok jotono paithang nai jat manwi. Phiya Kaitor le chwng no chwng rwlai mani gift ni slaibo kotor gift rwkha, abo wng kha Langmani Gift. Christmas ni salo chwng je gift rwlai mani abo Kaitor ni aroni kotor gift man mano chwng no muitu khlai rwo.
Swngcharo borok wngwi achai khe salsa joto borok no ma thwi nai, a kok elembago sajak tongo Hebru: 9:27 sao, “Uaisa le joto borokno ma thwithai, aboni ulo Kaitor bai buj thumjaknai.”
Chini langmao kainwi langma tongo; abo wngkha- Thwiblang langma tei Paiphlaiya langma. Thwiblang langma wngkha je chwng o hayungo tongmani langma. O langmani jora daktino pai thango. Tei chwng jotono o hano yakarwi ma thango. Aboni bagwi no obo thwiblang langma.
Paiphlaiya langma hwnkhe je chwng thwimani ulo, Jisu ni bisingtwi mwthangwi tisajagwi molbrum Bobai baksa Chukhnohao ma tongmani abo no Paiphlaiya langma. Baksa borok poitu chaya wngwi mano je aro thwimani ulobo langma tongo. Phiya o kok kubui je chwng thwimani ulo tei kaisa langmao sogwi nai.
O hayungo thwimani abono borokni paithak kirimung. Joto borok no thwinano kirijago. Phiya borokrok sai manya je aro thwimani ulo tei kaisa langma tongo. Abono paiphlaiya langma. Abo se tongphlainai. O langma chwng Bugra Jisu ni bisingtwi simi no manwi mano. O langmano rwna bagwi no tini Bo 2000 bisi swkang o hayungo borok wngwi achai phai kha.
Tomung aro kainwi langma tong khe thwimung bo uainwi tongo chini. O hayung no yakarwi ma thangmani abo wngkha chini puilani thwimung, tei thwimani ulo je phuru chwng Kaitor ni bwskango ma bachanai aphuru joto borok Kaitor bai buj thumjaknai. Je borok sumsok khlaima yakarya, tei kha kiphilwi Jisu ni thani phaiya tei Jisu no poitu bo khlaiya bohrok morke horo eba paiphlaiya horni bwlwngo khiklai rwjaknai.
Borok chirik khogwi ua hului kabwi ma tong nai, borok aroni yoknani kunu lama kwrwi. Molbrum ni bagwi borok kosto manwi ma tong nai. Abo no langmani uainwi thwima. O thwimung no Katina bagwi no tini borokrok sabo mwthangwi mano hwnwi soi lamano ma naituk laio.
Borok o hayung ni thwiblang langmano thwina kirimani sai paiphlaiya langmao ma thwinani no se jotoni sai kirina nangkugo. Paiphlaiya langmao molbrum ni bagwi kosto manjagwi ma tongnani yak ni chwng no sabo phiyogwi man bono se chwng ma naituk nai. O hayungo thwinani chwng kirio, aboto kirina ni kokno, phiya aboni saibo kwbang chwng kirithai paiphlaiya langmao ma thwi mani.
Borokrok morkehao eba thwiblang hao sogwi nani yakni yoknani mungsa lama kwrwi tongmani. Borok sak sakno phiyogwi manya. Phiya Kwplaisa Kaitor sak baithang borokni Sajla wngwi o hayungo achai phai kha. Bini achai phaimao naharmung kaisa no, abo wngkha borokrok no langma rwnani.
You can also watch New Year Message here.
Langmani Gift/Gift of Life
Johon 3:16-17 sao, “Tamni hwnba Kaitor swngcharno aswk hamjakmani bagwi bini songdari Sajlano rohor kha, bini a Sajlano poito khlainai borok bo komor yaui mwthangjak phlaiwi manna twi khe Kaitor bono rohor kha. Kaitor bini Sajlano swngcharno majra berna hwnwi swngcharo rohor ya, tamo khe swngchar ba bo bai mwthangjak si thung hwnwi se rohoro.”
Tabuk nwng saui mano, swngchar tamo khlaima bagwi thwina nangkha ba! Hwnwi.
Rum 3:23 sao, “..Bebak bororok no sumsok khlai kha, hakhe chwngsajak Kaitor bai hakchal wngkha.”
Rum 6:23 sao, “Sumsok khlai khe ma thwi nai, tamo khe Kaitor haino rwmani abo wngkha chini Subrai Khristo Jisu bai thansa wngma bisingtwi chwngno mwthang phlainai.”
Rum 1:17 “…… Poito khlaima bisingtwi Kaitor bai kaham hwnwi romjaknai borok bo se thangnai.”
Tabuk nwng buchiui mankhana, Jisu tamo ni bagwi o hayungo phaina nangkha. Rum 6:23 ni mote borok sumsok khlaima bagwi ma thwi kha, borok sakno mwthang nani mungsa lama kwrwi. Phiya Kaitor ni aroni Langmani Gift haino magnang borokno rwjakma bai borok mwthangjakna ni lamano mankha. A langmani gift no se tini hayung ni joto borok o Christmas ni salo mankha. Hakhe langmani gift le tamo eba sabo? Langmani gift wngkha Jisu sak baithang.
Christmas ni salo chwng Jisu no man mani a bono chini langmani gift. O gift no chwng rang bai paiui manya. Obo Kaitor ni hamjakma tei khairokma bai chwng no magnang se rwjago. Langmani Gift eba Gift of Life man maswk bara gift kotor o ha sakao tai tamo tong si! Phiya o gift no chwng kebo ajiui manya, tamo khe Kaitor bini sak baithang se o Langmani Gift no chwng no rwo.
Jephuru chwng Jisu ni bisingtwi o Langmani Gift no man kha, chwng tei kwthwino kirina nangliya. Tei chwng lobmungo sama hai saui man kha.
Lobmung 23:4 o sakha: “Kwthwi sampilini harungtwi ang him phuru phano aphurubo ang mungsa hamyano kiriglak; tamoni hwn ba nwng ang bai tongo…”
Tini ni ani Christmas ni message wngkha, 2024 bisi ni Christmas salo nini langmao, nukhungo Langmani Gift no yachak di. Jisu no nini nogo twlang di, nini bwkhao achairwdi. Sai mandi joto borokno sumsok khlai kha, hakhe sumsok khlai khe ma thwi nai. Aboni bagwi jotto borok Jisu no nango. Jisu simi no chwng no paiphlaiya langma rwi mannai.
Paithak Kok Kwcharma
O Christmas ni salo nwng kwbangma gift manwi mano phiya tomung nwng tabukbo Langmani Gift eba Gift of Life no mase manyakho hwnkhe tabukbo nwng bukchano kho! Aboni bagwi o sal kotor ni salo ang norok jotono kaisa kotorkuk Gift yapharna muchungo, abo no LANGMA ni GIFT tei a langmani Gift wngkha JISU SAKBAITHANG. Please nini langmao tei nukhungo o Langmani Gift no yachak di tei nukhung ni joto borok bai bagwi nalai di.
Hambai jora naui o message no porima bagwi.
Kaitor ni hamjakma, khairokma, khakchangma, khatungma tei hamari nini langmao tei nukhungo tongthung. Amen.